Қазақстан Республикасы музейлерін цифрландыру және дамыту

2026 жылдың 22-26 маусым аралығында елордамызда мәдениет пен ғылымның көкжиегін кеңейткен айтулы шара-«Қазақстан Республикасы музейлерін цифрландыру және дамыту» атты халықаралық семинар өтті. Іс-шара Қазақстан Республикасы Мәдениет және ақпарат министрлігі, Түркия Республикасының Мәдениет және туризм министрлігі, Түрік ынтымақтастық және үйлестіру агенттігі (TIKA) және Қазақстан музейлерін дамыту жөніндегі үйлестіру-әдістемелік орталығымен ұйымдастырылды.

Ауқымды білім алаңында еліміздің түкпір-түкпірінен, атап айтқанда, республикалық және өңірлік музейлерден жиналған 100-ге жуық маман бас қосып, заманауи музей ісінің ең өзекті трендтерімен танысты. «Бозоқ» тарихи-мәдени музей-қорығының ғылыми қызметкерлері де семинар барысында музей қорларын сапалы цифрландырудың инновациялық тетіктерін, виртуалды музейлер кеңістігін дамытудың халықаралық тәжірибесін және экспозицияларды заманауи технологиялармен байыта отырып, келушілердің танымдық қызығушылығын арттыру жолдарын қарастырған мазмұнды баяндамаларды ықыласпен тыңдады.

Бес күнге созылған тәжірибе алмасу барысында Түркия Республикасы Мәдени мұралар және музейлер бас басқармасынан арнайы келген мәртебелі ғалымдар-15 шілде Демократия музейінің директоры Әли Хайдар Аталар, Музейлер департаментінің музей зерттеушісі Гюльсехер Гюрген және «Болашаққа мұра» департаментінің PhD археологы Перихан Дөнерташ мазмұнды дәрістер оқып, Түркия музейлерінің озық тәжірибелері мен заманауи трендтерін ортаға салды. Сондай-ақ бауырлас елдің сарапшылары Қазақстан музейлерінің тыныс-тіршілігімен және бай тарихи қорымен жақын танысып, қатысушылармен бірге екі ел арасындағы мәдени-ғылыми ықпалдастықты күшейту, бірлескен халықаралық ғылыми жобаларды жүзеге асыру төңірегінде пайымды пікірлер мен тың ұсыныстар алмасты.