«Музейге сый» акциясы аясында Қазақстан Республикасының Мемлекеттік тарихи-мәдени «Бозоқ» музей-қорығына алашаның қолмен тоқылған ерекше, сирек кездесетін кілемі музей қоры толықтырды. Құнды жәдігерді музейге Ақтөбе облысының танымал тұлғасы, қоғам қайраткері, өлкетанушы Жібек апай Османқызы сыйға тартты. Бұл алаша Есқалиев Назардың отбасына тиесілі болған, оның әжесі шебер ісмер болған.
Қазақ халқының сәндік-қолданбалы өнерінің құрметті салаларының бірі — дәстүрлі тоқымашылық. Әрбір қазақ отбасы тұрмысқа қажетті кілем-төсеніштерді өздері тоқып, қолдан жасаған. Алаша сияқты бұйымдар киіз үйдің ішкі көрінісінде маңызды рөл атқарған. Алашаның өрнегі кілемнің бүкіл бетінде қайталанатын нәзік, көркем ою-өрнекпен безендірілген. Кең жолақтар фон мен өрнек түстерінің алма-кезек ауысуымен ерекшеленеді. Мұндай жарқын әрі сәнді бұйымдар үй ішіне мерекелік көңіл-күй сыйлап, отбасы берекесі мен бақыттың белгісі ретінде қабылданады.
