Кездесу аясында белгілі композитор, Қазақстанның еңбек сіңірген қайраткері Балнұр Балғабекқызы Қыдырбектің қатысуымен дәріс – концерт өтті, онда қатысушыларға қазақ музыкалық өнерінің дамуы мен шығармашылық үдерісі туралы ақпарат ұсынылды

Іс-шараға Астана қаласының №91 мектеп-лицейі мен Целиноград ауданы Қараөткел ауылының мектебі оқушылары қатысты.

Бағдарлама барысында Нұрғиса Тілендиевтің шығармашылығына арналған бейнематериалдар көрсетілді. Атап айтқанда, «АТА ТОЛҒАУЫ», «МАХАМБЕТ», «ӨЗ ЕЛІМ», «ҚҰСТАР ӘНІ» сынды туындыларының бейнежазбалары ұсынылып, композитордың музыкалық мұрасы жан-жақты таныстырылды. Сонымен қатар, Н.Тілендиевтің өмір жолы мен шығармашылық ерекшеліктеріне арналған деректі бейне-концерттік бағдарлама көрермен назарына ұсынылды.

Бұл кездесу жас ұрпақты ұлттық өнерге баулу, қазақ музыкасының көрнекті өкілдерінің шығармашылығын кеңінен насихаттау мақсатында ұйымдастырылып, оқушылардың эстетикалық талғамының дамуына және тарихи-мәдени таным көкжиегінің кеңеюіне септігін тигізді.