Осыған байланысты «Наурыз мейрамы» тұжырымдамасы аясында 2025 жылғы 20 наурызда Қазақстан Республикасы Мәдениет және ақпарат министрлігіне қарасты «БОЗОҚ» мемлекеттік тарихи-мәдени музей-қорығы «ҰЛТТЫҚ СПОРТ КҮНІ» мерекесіне арналған «Жауынгерлік рух» спорттық шарасын ұйымдастырды.
Ұлттық спорт түрлері – қазақ халқының мәдени мұрасының ажырамас бөлігі. Олар тек дене дайындығының деңгейін көрсетіп қана қоймай, сондай-ақ ғасырлар бойы қалыптасқан жауынгерлік өнер дәстүрлерін, төзімділік пен батылдықты бейнелейді. Бүгінде аударыспақ, бәйге, жамбы ату, көкпар, қазақша күрес және тоғызқұмалақ сияқты ұлттық спорт түрлері ұлттық бірегейліктің маңызды элементтері болып қала береді. Оларды қайта жаңғырту мен жастар арасында кеңінен насихаттау тарихи мұраны сақтауға ғана емес, сонымен қатар ұлттық рух пен патриотизмді нығайтуға ықпал етеді.
Дәстүрлі спорт түрлері қазақ мәдениетінде ерекше орын алады, олардың ішінде садақ ату өнері аса жоғары бағаланған. Ол батылдық пен төзімділіктің белгісі, жауынгерлік өнердің шыңы ретінде саналған. Ағаштан, сүйек пен сіңірден жасалған қазақтың құрама садақтары жоғары серпінділік пен мықты тартылыс күшімен ерекшеленіп, атылған жебенің қашықтығы мен дәлдігін қамтамасыз еткен. Бұл қару көшпенділердің әскери басымдығын айқындап қана қоймай, олардың тәрбиелік жүйесінің де маңызды бөлігі болған. Садақ ату шеберлігі ұлдар мен қыздардың әскери дайындығының ажырамас бөлігі саналып, дене және психологиялық дамуын жетілдіруге ықпал еткен.
Садақ ату машықтарын үйрету ерте жастан басталған. Наурыз мерекесінде өткізілетін «Жамбы ату» сайысы – жауынгерлік шеберліктің маңызды сынағының бірі болған. Жарыс барысында шабандоздар шауып келе жатып, биікте ілінген жүлденің бауын (жіп, қайыс немесе бау) атып түсіруі керек еді. Бұл тәсіл садақшылардың дәлдігін, жылдам бағалау және шешім қабылдау қабілетін жетілдіріп, шайқас кезінде өмірлік маңызы бар дағдыларды дамытуға көмектескен. Іс-шара барысында тарихи-мәдени мұра нысандарын қорғау бөлімінің бас инспекторы Жанболат Қазанбаев қатысушыларға садақтың қару ретіндегі дамуы және оның дала өркениеттеріндегі маңызы туралы кеңінен баяндады. Ол көшпенділердің мобильді өмір салтында садақтың теңдессіз қару болғанын атап өтті, өйткені ол шайқас барысында қашықтықтан соққы жасауға және қозғалысты бәсеңдетпей соғыс жүргізуге мүмкіндік берген. Сонымен қатар, Жанболат Қазанбаев дәстүрлі қазақ садағынан ату бойынша шеберлік сабағын өткізіп, түрлі тарту әдістерін, садақшы тұрысын және нысана көздеудің тәсілдерін көрсетті. Қатысушылар ата-бабаларымыз қолданған құрама садақтан оқ ату мүмкіндігіне ие болды.
Бұл спорттық шара «Ұлттық спорт күні» мерекесінің ұлттық спорт түрлерін дәріптеудегі маңызын және оның мәдени мұраны сақтау, дәстүрлер мен құндылықтарды келер ұрпаққа жеткізудегі рөлін айшықтады.
