Осыған орай, «Наурыз мейрамы» тұжырымдамасына сәйкес 18 наурыз 2025 жылы Қазақстан Республикасы Мәдениет және ақпарат министрлігі Мәдениет комитетінің «БОЗОҚ» мемлекеттік тарихи-мәдени музей-қорығы «ҰЛТТЫҚ КИІМ КҮНІ» мерекесіне арналған «Nauryz Fashion Week» атты заманауи стильдегі қазақ ұлттық киімдерінің фотосессиясын ұйымдастырды.

Соңғы жылдары дәстүрлі киімге деген қоғамның қызығушылығы артып, оның мектептерде, оқу орындарында, мемлекеттік мекемелерде және ірі компанияларда кеңінен таралуына ықпал етті. Бұл сұраныстың өсуі тігін өндірісінің дамуына, жаңа брендтердің және мамандандырылған дүкендердің пайда болуына әсер етті. Қазіргі заманғы сән мен дәстүрлер бірнеше буын дизайнерлерін, тігіншілер мен қолөнершілерді біріктіріп, қазақ ұлттық киімінің ерекше стилін қалыптастыруда. Бұл мереке мәдени мотивтердің сабақтастығын және олардың қазіргі қоғамдағы маңыздылығын бейнелейді, ал жастар арасында дәстүрлі стильді насихаттау мәдени кодты сақтау мен ұлттық құндылықтарды келер ұрпаққа жеткізу жолында маңызды рөл атқарады.

«Nauryz Fashion Week» аясында жастар ұлттық сәннің өзекті үрдістерін таныстырып, дәстүрлі ою-өрнектердің, кесте мен әшекейлердің күнделікті киім үлгілеріне үйлесімді кіріктірілуін көрсетті. Қазақ модасы шекарадан асып, халықаралық қауымдастықтың назарын аударып, әлемдік деңгейде ерекше мәдени бірегейлікті паш етуде. «Ұлттық киім күні» ұлттық стильдің Қазақстанның айрықша болмысының маңызды элементі екенін айғақтайды және халықтық киімге деген қызығушылықтың жандануына, дәстүрдің келер ұрпаққа берілуіне ықпал етеді.

«БОЗОҚ» музей-қорығының ұжымы баршаңызды «Ұлттық киім күні» мерекесімен құттықтай отырып, заманауи ұлттық киім үлгісін кеңінен насихаттауға шақырады!