Іс-шара «Көне Бозоқ қалашығының археологиялық қазбалары негізінде ашық аспан астындағы Ұлттық парк құру» жобасы аясында ұйымдастырылып, тарихи ескерткіштерді реконструкциялау бойынша халықаралық тәжірибені зерттеуге бағытталған.
Конференцияның басты мақсаты – археологиялық ескерткіштерді музейлендіру және қайта құру мәселелерін талқылау, оларды қазіргі музейлік кеңістікке кіріктіру жолдарын қарастыру. Арнайы шақырылған Ресей, Әзербайжан және Түркияның музей ісі мамандарымен тәжірибе алмасу конференцияның негізгі бағыттарының бірі болмақ. Бұл елдерде тарихи-мәдени мұраны сақтау және қалпына келтіру заманауи әдістер негізінде қарқынды жүргізілуде. Халықаралық тәжірибе көрсеткендей, музейлендіру – тарихты сақтаудың ғана емес, сонымен қатар әлеуметтік, білім беру және экономикалық салалардағы маңызды ресурс бола алады
Бүгінде археологиялық нысандарды музейлендіру мен реконструкциялау мәдени мұраны сақтаудағы басым бағыттардың бірі саналады. «Бозоқ» музей-қорығы да қоныстық кешендерді ғылыми негізде қайта қалпына келтіру жұмыстарын жоспарлап отыр, бұл өз кезегінде халықаралық тәжірибені мұқият зерделеуді талап етеді. Шетелдік музейлендіру жобалары тарихи нысандарды кешенді сақтау мен қайта құрудың тұрақты тәжірибесіне ие, әрбір шешім мәдени кодты сақтай отырып қабылданады. Бұл қағида «Бозоқ» археологиялық паркінің музейлік кеңістігін қалыптастыруда ерекше маңызды.
Конференция аясында археологиялық ескерткіштерді музейлендіру және қайта құру тәжірибесі, заманауи экспозициялар жасаудағы дәстүрлер мен инновациялар, мәдени ландшафттың музейлік кеңістік құрудағы рөлі сияқты өзекті мәселелер талқыланады. Сондай-ақ, тарихи мұраны насихаттау, оның қоғам санасына ықпалы және ұлттық бірегейлікті нығайтудағы маңызы мәселелеріне баса назар аударылады.
Іс-шараға қазақстандық және шетелдік жетекші ғалымдар, археологтар, этнологтар мен музей ісінің сарапшылары қатысады. Конференция барысында музей құрылысын дамыту және археологиялық нысандарды Қазақстанның мәдени кеңістігіне кіріктіру перспективалары бойынша пікірталастар мен тәжірибе алмасу жоспарланған.
