"Бозоқ" музей-қорығының ұжымы белгілі ғалым, археолог Виктор Федорович Зайберттің қайтыс болғаны туралы терең күйзеліспен естіді.

Виктор Федорович 40 жылдан астам өмірін Солтүстік Қазақстан аумағындағы ежелгі ескерткіштерді зерттеуге арнады. Оның көптеген зерттеулері, ғылыми жұмыстары, мақалалары мен музей экспозициялары елден тыс жерлерде кеңінен танымал. Виктор Федоровичтің есімі оның жарқын ғылыми ашылуымен және дүниежүзілік тарихқа жаңа беттер жазған әлемдегі бірегей Ботай қонысын зерттеумен байланысты. Ғалым Ботай мәдениеті дала өркениетінің бастауы екенін дәлелдеді. Ол Солтүстік Қазақстан тарихы бойынша 200-ден астам ғылыми жарияланымның авторы.

Виктор Федорович «Бозоқ» ашық аспан астында ұлттық парк құру» жобасының басты тәлімгерлерінің бірі болды, энеолит қонысын қалпына келтіру бойынша ғылыми-әдістемелік кеңес берді, музейдің ғылыми, білім беру-танымдық іс-шараларына белсенді қатысты. Бұл Қазақстан тарих ғылымы үшін орны толмас қайғы.

Виктор Федоровичтің ұлы педагогикалық дарыны, қажырлы еңбегі, ізденістер романтикасы мен ғылыми тұжырымдарының қатаң қисыны өзі бастаған археологиялық ізденістерді жалғастырып дамытатын қазақстандық археологтарының жаңа плеядасын тәрбиеледі. Көптің жадында ғалым Қазақстан археология ғылымына адал әрі ынталы болып қала береді.