Кездесу барысында ол өз еңбегі – “Өзбекәлі және мәдени майдан” атты кітабы туралы кеңінен әңгімеледі. Бұл зерттеу еңбегі Қазақстанның көрнекті мемлекет және қоғам қайраткері, ғалым Өзбекәлі Жәнібековтің мәдени саясаттағы рөлін жан-жақты талдауға арналған. Автор Жәнібековтің ұлттық құндылықтарды сақтау мен жаңғырту жолындағы еңбегін, кеңестік идеология жағдайындағы мәдениет майданында жүргізген күресін тарихи-ғылыми контексте қарастырады.
Кітапта мәдени мұра, ұлттық сана, тарихи жады және рухани жаңғыру ұғымдары терең талданып, қазақ халқының мәдени болмысын сақтау жолындағы Өзбекәлі Жәнібековтің стратегиялық ұстанымдары айқын көрсетілген. Автор архивтік құжаттарға, тарихи деректерге, сондай-ақ зерттеушілердің еңбектеріне сүйене отырып, тұлғаның қазақ мәдениетіндегі орнын жаңаша қырынан ашып көрсетеді. Кездесу барысында Санжар Керімбай кеңестік кезеңдегі ұлттық мәдениетті сақтау мәселелері мен бүгінгі күнгі мәдени саясаттың сабақтастығы жөнінде ой қозғады. Сондай-ақ, аудиториямен пікір алмасу барысында қазақ интеллигенциясының рухани мұрасы, тарихи жадының маңыздылығы және ұлттық мәдениеттің жаһандану жағдайындағы даму болашағы туралы өз көзқарасын білдірді.
Бұл кітап – мәдениеттану, тарих және әлеуметтік ғылымдар саласындағы зерттеушілер үшін құнды еңбек болуымен қатар, ұлттық сана мен тарихи мұра тақырыбына қызығушылық танытатын жалпы оқырманға да маңызды.
